Një nga ngjarjet më të rëndësishme të ditës së diel ka qenë një sulm i njoftuar kundër dy anijeve në Detin e Kuq.
Ka pasuar shumë zhvillime që nga fillimi i publikimit të lajmit këtë pasdite, kështu që këtu është një përmbledhje e atyre që dimë deri më tani, sipas raportimit të Sky News.
Çfarë thonë Shtetet e Bashkuara?
Departamenti i Mbrojtjes theksoi se ishte në dijeni të raporteve që sugjeronin një sulm kundër luftanisë amerikane USS Carney dhe disa anijeve tregtare në Detin e Kuq.
Një zyrtar amerikan, duke folur në kushte anonime, bëri të ditur për Associated Press se sulmi nisi rreth orës 10 të mëngjesit në Sanaa, Jemen, dhe zgjati për rreth pesë orë.
Ndërkohë, dy zyrtarë të mbrojtjes më pas thanë për NBC se USS Carney kishte “neutralizuar një dron Houthi që po drejtohej në drejtim të tyre në Detin e Kuq jugor”, sipas raportimit të Sky News.
Ndërsa njëri prej zyrtarëve tha se “një numër i konsiderueshëm i anijeve tregtare në Detin e Kuq u sulmuan nga raketat Houthi” gjatë disa orëve.
Versioni i grupit Houthi
Rebelët Houthi të Jemenit, të mbështetur nga Irani, pretenduan se kishin goditur dy anije izraelite në ngushticën Bab al-Mandab të dielën, përdorur një dron të armatosur dhe një raketë detare.
Zëdhënësi i ushtrisë së grupit, gjeneral brigade Yahya Saree, tha se anija e parë që u sulmua ishte transportuesi me flamur të Bahamas, Unity Explorer, i cili është në pronësi të një firme britanike.
Një nga oficerët e saj është Dan David Ungar, i cili jeton në Izrael dhe është identifikuar në mediat shtetërore si djali i miliarderit izraelit të anijeve Abraham Ungar.
Anija e dytë ishte një anije me kontejnerë me flamur panamez, e njohur si Number Nine, e cila është e lidhur me Bernhard Schulte Shipmanagement, njoftoi Saree.
Në momentet e fundit, kompania administrative konfirmoi se anija ishte “goditur nga një predhë” ndërsa lundronte në ngushticë, por nuk kishte të lënduar.
Reagimi i Mbretërisë së Bashkuar
Agjencia e Operacioneve të Tregtisë Detare të Mbretërisë së Bashkuar njoftoi se kishte marrë raporte për një sulm me dron në ngushticën Bab al-Mandab.
Ajo gjithashtu raportoi për aktivitetin e dronëve të shpallur me origjinë nga Jemeni, si dhe një shpërthim të mundshëm.
Kompania britanike e sigurisë detare Ambrey dhe burimet treguan se një anije me transport të shumicës dhe një anije me kontejnerë ishin prekur nga të paktën dy drone.
Ambrey shtoi se anija e kontejnerëve thuhet se ka pësuar dëmtime nga një sulm me dron rreth 63 milje (rreth 100 kilometra) në veriperëndim të portit verior të Jemenit të Hodeidah.
Reagimi i Forcave të Mbrojtjes së Izraelit
Zëdhënësi i IDF-së, Daniel Hagari, ka thënë se dy anijet që pretendohej se ishin sulmuar nga Houthi-t nuk kishin asnjë lidhje me shtetin e Izraelit.
Ai shtoi se raketat “kanë rënë mbi dy anije tregtare” dhe njëra prej tyre ka pësuar dëmtime të konsiderueshme.
“Ajo është në rrezik të fundoset dhe një anije tjetër u dëmtua lehtë”, tha ai, duke fajësuar Iranin si mbështetës i Houthi-t për sulmin.
