Diskutimi ndërmjet anëtarëve të Odës Ekonomike Amerikane dhe Guvernatorit Ahmet Ismaili ka fokusuar në disa tema kyçe lidhur me sektorin financiar në Kosovë.
Drejtori Ekzekutiv i Odës Amerikane, Arian Zeka, ka shprehur falënderimin për guvernatorin për gatishmërinë dhe sinqeritetin në dialogun me sektorin privat. Ai gjithashtu ka ofruar përkrahjen e Odës Amerikane për një dialog konstruktiv me Bankën Qendrore të Republikës së Kosovës.
Guvernatori Ismaili ka vlerësuar mundësinë e diskutimit me përfaqësues të sektorit privat si një mënyrë për të kuptuar shqetësimet dhe brengat e tyre. Ai ka theksuar përgjegjshmërinë dhe kulturën e mirë të kthimit të kredive në Kosovë, duke theksuar normën e ulët të kredive joperformuese.
Gjatë diskutimit, guvernatori ka prezantuar të arriturat e sektorit financiar dhe ka bërë një prezantim të treguesve të likuiditetit, kapitalizimit, raportit midis kredive dhe depozitave, si dhe treguesve të tjerë relevante në pajtim me rregullativat.
Gjithashtu, Guvernatori Ismaili ka ndarë plane dhe prioritetet për vitin 2024 dhe vitet në vijim. Këto përfshijnë strategjinë pesëvjeçare të institucionit të tij, me pika fokusi si digjitalizimi, pagesat e shpejta, rritja e konkurrencës në sektor, qasja në financa dhe një politikë gjithëpërfshirëse. Ai ka folur edhe për iniciativat e planifikuara, përfshirë anëtarësimin në Zonën e Vetme të Pagesave të Bashkimit Evropian (SEPA).
Në përfundim, Guvernatori ka bërë vlerësime të larta për rolin e Qeverisë Amerikane në fuqizimin e Bankës Qendrore të Kosovës dhe ka falënderuar mbështetjen e Agjencisë së Shteteve të Bashkuara për Zhvillim Ndërkombëtar (USAID) në projektet e sektorit financiar në vend. Ai gjithashtu ka fokusuar në planet për të ulur përdorimin e parasë së gatshme në transaksionet e përditshme me qëllim të luftimit të ekonomisë joformale.
